సంఖ్యాబలం ఉన్నా శక్తి ఎందుకు లేదు?
భారతదేశంలో హిందువులు మెజారిటీ. అయినా ప్రతి ఎన్నికలో హిందూ ఓటు చీలిపోతుంది. జాతి, ఉపజాతి, ప్రాంతం, భాష, పార్టీ, నాయకుడు ఇలా ఎన్నో గోడలు హిందూ ఓటును విభజిస్తున్నాయి. అదే సమయంలో ఇతర సమూహాలు తమ గుర్తింపును రాజకీయ ఆయుధంగా మలుచుకుని, ఏకమై ఓటు వేస్తున్నాయి. ఫలితం ఏమిటి? సంఖ్యలో తక్కువైనా, రాజకీయంగా వారు ప్రభావవంతంగా మారుతున్నారు; సంఖ్యలో ఎక్కువైనా, హిందువులు నిర్ణయాత్మక శక్తిని కోల్పోతున్నారు.
ఇక్కడే “ప్రతి హిందువు నా బంధువు” అనే భావన రాజకీయ ప్రాధాన్యం సంతరించుకుంటుంది. ఇది కేవలం సామాజిక ఐక్యత కాదు. ఇది రాజకీయ ఐక్యతకు పునాది.
సెక్యులరిజం పేరుతో హిందూ నిర్లక్ష్యం
భారత రాజకీయం ఒక విచిత్రమైన విరోధాభాసాన్ని చూపిస్తుంది. సెక్యులరిజం పేరుతో హిందూ ధర్మాన్ని ప్రశ్నించడం, అవహేళన చేయడం, దూషించడం సాధారణంగా మారింది. దేవాలయాలపై ప్రభుత్వ నియంత్రణ, హిందూ పండుగలపై ఆంక్షలు, సంప్రదాయాలపై వ్యంగ్యం మొదలగునవి “ప్రగతిశీలత”గా ముద్ర వేయబడుతున్నాయి. అదే సమయంలో ఇతరల విషయంలో అదే ప్రమాణాలు వర్తించవు.
ఈ అసమానతను ప్రశ్నించే రాజకీయ చైతన్యం హిందూ సమాజంలో తక్కువగా ఉంది. కారణం, హిందువు తనను తాను ముందుగా హిందువుగా కాకుండా, కేవలం ఒక జాతి సభ్యుడిగా లేదా పార్టీ అనుచరుడిగా మాత్రమే చూసుకోవడం.
ధర్మం రాజకీయాల్లో ఉండకూడదా?
“రాజకీయాల్లో ధర్మం ఉండకూడదు” అనే వాదనను తరచూ వినిపిస్తారు. కానీ వాస్తవం ఏమిటంటే, ధర్మం లేకుండా రాజకీయాలు నడిచినప్పుడే అవినీతి, అవకాశవాదం, విలువల పతనం పెరుగుతాయి. సనాతన హిందూ ధర్మం రాజకీయాల్లో జోక్యం అంటే అది మతాధిపత్యం కాదు. న్యాయం, సమానత్వం, బాధ్యత, సత్యం వంటి విలువలు పాలనలోకి రావడమే.
సనాతన హిందూ సమాజం ఈ సత్యాన్ని అర్థం చేసుకోకపోతే, రాజకీయాలు ఎప్పటికీ ధర్మ విరుద్ధ శక్తుల చేతుల్లోనే ఉంటాయి.
విభజన రాజకీయాలకు ప్రత్యామ్నాయం
ఈ దేశంలో ఓటు బ్యాంకు రాజకీయాలు విభజన మీదే ఆధారపడి ఉన్నాయి. హిందువులు విడిపోయి ఉన్నంత కాలం, ఈ రాజకీయాలు కొనసాగుతూనే ఉంటాయి. కానీ హిందువు తన ఎదుటి హిందువును “నా బంధువు”గా చూడడం మొదలుపెడితే, ఈ విభజన రాజకీయాలకు పునాది కూలిపోతుంది.
ఇది ఏ పార్టీకి మద్దతు ఇవ్వాలనే పిలుపు కాదు. ధర్మానికి వ్యతిరేకంగా పనిచేసే ఏ శక్తినైనా ప్రశ్నించే ధైర్యం కలగాలనే పిలుపు.
మన గమ్యం ఏమిటి?
* హిందూ ధర్మానికి గౌరవం కలిగించే పాలన
* సంస్కృతికి రక్షణ కలిగించే విధానాలు
* రాబోయే తరాలకు భయంలేని హిందూ గుర్తింపు
ఈ గమ్యం సాధ్యమయ్యేది హిందూ ఐక్యత ద్వారానే
ముగింపు
“ప్రతి హిందువు నా బంధువు. మన ధర్మం, మన గమ్యం ఒక్కటే” అనే వాక్యం ఒక నినాదం కాదు; అది ఒక రాజకీయ దిశాసూచి. హిందువులు ఈ భావనను అంగీకరించిన రోజే, భారత రాజకీయాల్లో సమతుల్యత తిరిగి వస్తుంది. ఆ రోజు ధర్మం బలపడుతుంది, దేశం నిజమైన అర్థంలో ముందుకు సాగుతుంది.
- తుంగా శ్రీ
