ప్రపంచంలో నిజమైన దేవత తల్లి - తుంగా శ్రీ

మనిషి జీవితంలో దేవుడి గురించి ఎన్నో తత్వాలు, భావనలు ఉన్నాయి. కొందరు దేవుడు ఆలయంలో ఉంటాడంటారు, కొందరు ప్రకృతిలో ఉంటాడంటారు, మరికొందరు మన హృదయంలోనే దేవుడు ఉంటాడంటారు. కానీ మన జీవితాన్ని నిజంగా గమనిస్తే, దేవుడి రూపం మన కళ్ల ముందే కనిపిస్తుంది. ఆ రూపమే తల్లి. ప్రపంచంలో నిజమైన దేవుడు ఎవరంటే తల్లి అని చెప్పడంలో ఎలాంటి అతిశయోక్తి లేదు.

తల్లి అంటే కేవలం ఒక పదం కాదు, అది ఒక భావం. ఆ భావంలో ప్రేమ ఉంది, త్యాగం ఉంది, సహనం ఉంది, క్షమ ఉంది. ఒక పిల్లవాడు ఈ ప్రపంచంలోకి రావడానికి తొమ్మిది నెలలు తన గర్భంలో మోసి, ఎన్నో బాధలు భరించి జన్మనిచ్చేది తల్లే. ఆ బాధను మాటల్లో చెప్పడం అసాధ్యం. కానీ ఆ బాధలో కూడా తల్లి ఆనందాన్ని కనుగొంటుంది, ఎందుకంటే తన బిడ్డను ఈ లోకానికి తీసుకువచ్చే పవిత్రమైన బాధ అది.

పిల్లవాడు పుట్టిన తరువాత తల్లి జీవితం పూర్తిగా మారిపోతుంది. తన సొంత నిద్రను, తన సొంత అవసరాలను కూడా పక్కన పెట్టి, బిడ్డ కోసం జీవిస్తుంది. బిడ్డ ఏడిస్తే తల్లి హృదయం కరిగిపోతుంది. బిడ్డ నవ్వితే తల్లి ప్రపంచాన్ని గెలిచినంత ఆనందం పొందుతుంది. బిడ్డకు చిన్న గాయం అయినా తల్లి మనసు తట్టుకోలేను. ఎందుకంటే తల్లి ప్రేమకు ఎలాంటి హద్దులు ఉండవు.

తల్లి ప్రేమను దేవుడి ప్రేమతో పోల్చుతారు. దేవుడు మనకు కనిపించకపోయినా, తల్లి మాత్రం మన కళ్లముందే ఉంటుంది. దేవుడు మన కోసం ఏమి చేస్తాడో మనకు తెలియకపోవచ్చు, కానీ తల్లి మన కోసం ఏమి చేస్తుందో మనం ప్రతిరోజూ చూస్తుంటాం. పిల్లల కోసం తల్లి తన జీవితాన్నే త్యాగం చేయడానికి సిద్ధంగా ఉంటుంది. ఇదే నిజమైన దైవత్వం.

చిన్నప్పుడు పిల్లవాడు నడవలేకపోతే తల్లి చేతులు పట్టుకుని నడిపిస్తుంది. మాట్లాడలేకపోతే మాటలు నేర్పుతుంది. చదవలేకపోతే చదువు నేర్పుతుంది. జీవితంలో ఎదురయ్యే ప్రతి సమస్యను ఎదుర్కొనే ధైర్యం కూడా తల్లే ఇస్తుంది. అంటే మన జీవితానికి పునాది వేసేది కూడా తల్లే.

తల్లి ప్రేమ ఎప్పుడూ స్వార్థం లేని ప్రేమ. పిల్లవాడు ఎంత పెద్దవాడైనా, ఎంత తప్పు చేసినా కూడా తల్లి హృదయం క్షమించడానికి సిద్ధంగా ఉంటుంది. తల్లి కోపపడినా, ఆ కోపం కూడా ప్రేమతోనే ఉంటుంది. ఎందుకంటే తల్లి కోరేది ఒకటే 'తన పిల్లవాడు సంతోషంగా, మంచి మనిషిగా ఎదగాలి'.

ఈ ప్రపంచంలో మనకు ఎవరైనా తోడుగా ఉండకపోయినా, తల్లి మాత్రం ఎప్పటికీ మన వెంటే ఉంటుంది. మన బాధను చూసి కన్నీరు పెట్టుకునే మొదటి మనిషి తల్లే. మన విజయాన్ని చూసి గర్వపడే మొదటి మనిషి కూడా తల్లే.

అందుకే మన సంస్కృతిలో “మాతృ దేవో భవ” అని చెప్పారు. అంటే తల్లిని దేవుడిగా భావించాలి అని అర్థం. తల్లి మనకు జీవితం ఇచ్చింది, ప్రేమ ఇచ్చింది, విలువలు నేర్పింది. అందుకే ప్రపంచంలో నిజమైన దేవుడు ఎవరంటే "తల్లి" అని చెప్పడం సత్యం.

కాబట్టి మనం ఎప్పుడూ తల్లిని గౌరవించాలి. ఆమె చేసిన త్యాగాలను గుర్తుంచుకోవాలి. తల్లి ఉన్నంత కాలం ఆమెను ప్రేమతో చూసుకోవాలి. ఎందుకంటే తల్లి ప్రేమ మన జీవితంలో అత్యంత పవిత్రమైన వరం.

చివరగా ఒక సత్యం, దేవుడు మన జీవితంలో తల్లి రూపంలోనే మనతో ఉంటాడు.

- తుంగా శ్రీ